19 noyabr 2025-ci il tarixində “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”nın 2025–2027-ci illəri əhatə edən Təfsilatlı Tədbirlər Planında Azərbaycan Respublikasının Prezidenti yanında Dövlət İdarəçilik Akademiyasına (DİA) həvalə edilmiş tədbirlərin icrası çərçivəsində Naxçıvan Muxtar Respublikasının mərkəzi icra hakimiyyəti orqanlarında fəaliyyət göstərən dövlət qulluqçuları üçün “Dövlət qulluğunda motivasiya” mövzusunda təlim həyata keçirilmişdir.

Təlim DİA-nın “Dövlət Qulluğu və Kadr Siyasəti” kafedrasının baş müəllimi, siyasi elmlər üzrə fəlsəfə doktoru Esmira Qasım qızı Osmanova tərəfindən təqdim olunmuşdur. Mühazirəçi öz çıxışında dövlət qulluğunda motivasiya mexanizmlərinin əmək məhsuldarlığının, xidmətdə səmərəliliyin və peşəkarlığın artırılmasında strateji əhəmiyyət daşıdığını xüsusi vurğulamışdır.

Təlim müddətində iştirakçılara motivasiya nəzəriyyələri, müasir kadr siyasətinin əsas istiqamətləri, işçi məmnuniyyətinə təsir göstərən sosial-psixoloji və institusional amillər, eləcə də dövlət qulluğunda peşəkar inkişafın stimullaşdırılmasına dair aktual yanaşmalar təqdim edilmişdir. Bununla yanaşı, dövlət qulluğunda motivasiya sisteminin strukturlaşdırılması, insan resurslarının idarə edilməsində psixoloji və idarəetmə faktorlarının öyrənilməsi, komanda mühitinin formalaşdırılması, fəaliyyətin qiymətləndirilməsi və mükafatlandırma mexanizmlərinin tətbiqi istiqamətlərində geniş izahlar verilmişdir.

Təlim prosesində iştirakçılar motivasiya sistemlərinin tətbiqində üzə çıxa biləcək institusional və təşkilati çətinliklərin aradan qaldırılması, dövlət idarəçiliyində müasir yanaşmaların inteqrasiyası və qərar qəbuletmə prosesində motivasiya alətlərinin əhəmiyyəti mövzularında praktik müzakirələr aparmışlar.

Təlimin sonunda vurğulanmışdır ki, səmərəli motivasiya sistemi dövlət qulluğunda şəffaflığın, məsuliyyətin, idarəetmədə peşəkarlığın və xidmət keyfiyyətinin artırılmasının əsas şərtlərindən biridir. Təlim prosesinin yüksək dərəcədə interaktiv şəkildə keçirilməsi iştirakçıların mövzunu daha dərindən mənimsəməsinə, fikir mübadiləsində aktiv iştirakına və praktiki bacarıqlarını təkmilləşdirməsinə imkan yaratmışdır.